केडी रेम्नीसीङमी मिन्तुम खस्मा .....।
सानीवामी नाक्का मान्तुप.............
सानीवामी नाक्का मान्तुप छुये होगो हेप्लो,
सम्तुमाखेर मिक्वा छुना हुप्से होगो हेप्लो।
खोलोपिकाङ कोप सानिवा होप पिकाङ सते,
गोपाक रिङ पयाम्दो योउ सिप्प नाम मते ।
गोपाक रिङ पिमान्दुर्ङा गोपाङ तुन्चानु,
ओमिस्ङा आन मान्छुसो सुक्वाङ छुन्चानु ।
सानीवा मासा नाम्कुर्मा कुइखी ओमी ओमुक्स्सो,
खोलोङ सुक्वा आम्मीङा छुन्खानु ओमिसो ।
कोङ तुवो हन्ना आन् आम्जी नइक खोङोना,
सम्तुमा मिम सानीवा पिम मत्नो पियाम्ना ।
साल्मः विवेक कुलुङ
संगितः अर्जुुुन पोखरेल
फिल्मः तेल्पोस्
हिक केला ....
हिक केला सेपा हिक्काङा पेर्खी सेमोसो फिलिलि,
एस्पा उई तुम्पा एसे उइ छुम्पा गोङ हुये धिरिरी ।
आनासो आम्रीङ कोङासो ओरिङ गोपाङा युम्पाफो
मात्तुस्व आना आमचउ कीना गेतोछा तुम्पासो,
सानिवा मासा मोम् छुक्तो खाता हनाने आम्ङाली
एस्पा उक तुम्पा एसे तोम् छुम्पा गोङ हुये धिरिरी ।
बुङ्खापी बाइप बुङतोङ्क छुम्पा आसासो बिक्खापा
खोवालबुङ तोङ्ना मान्छुङा कोङ मोम्गोप्तो माप्खापा
आम् अल्मा कोङा ओसानिवापी युक्सोके चिरिरी,
योउ युवोचोयो उमथेम्पी मान्दाइप गोङ हुये धिरिरी ।
नेपालमी ङाली फात्तोलो.............
इनीक नीङदोङ फाइम
मिनारी दाचाम
चाक्चाकुरपी,
सोलु महाकुलुङमी पिल्मो
संखुसभामी छिङ्खा,
भोजपुरपाक कुलुङ,
सुनसरीम देवीगाउँ,
खेना,
ई होप होपतोक चारतेल्पी,
बात्ल छुम्पालो,
रीङ लत्ताक तुवा
नेपालमी ङाली फात्तोलो,
नेपालमी ङाली नीङ छुतोलो,
ईसाल्मक हाकई हाकपी वाने?
पिम्पाना,
साल्म मम्पा तुवा ।
खोलोङ वाइस्को,
खालोङ तुस्को,
इचारतेल ई नेपालपी,
केई तुस्को इसाल्म वाइस्को,
किरात पीक ई महाकुलुङ,
ई महाकुलुङमी ङाली उम्ङाली दाइप,
ई चार छुमछुये,
खारोलोई खन्पी,
कुलुङङाङ मा,
खोलोङ इतोरो लाइपा,
खोलोङ वाइस्को, खोलोङ तुस्को,
छुम्छुये पिम्पाना,
पोम्पा तुवा ।
खुङ्क रीङ माताम्दो,
छुनोकइके ङाल्लप नेपाल,
तयाम्नोकइके नीङ नेपाल,
फात्नोकइके नेपालमी ङाली ।
बुर्हेम्ची खातो ....
बुर्हेम्ची खातो दोबेरबुङ तुयो जिङाई नखाते,
जिस् मेक्तो खातो खोवालबुङ तुयो गोलुम्ङा पेर्खाते ।
हाल्स खाताना बोतोङगाल ता आ सिछोलिम् आप्चय,
मेस–पीमी गथा सोगोगोहेम् तुये छोवा योङ खप्चय ।
देच्छा छुलो नाम्साम् दात्लो होकुवा लये गोङ,
देउ–तोउ काइलो येनाम् ताइलो गिगियो सिछोसोङ ।
तेल्गोपु वा ता बुर्छोक्तो नोङ ता चुङछाची लचाये,
महाकुलुङ तेल्पी छाम्छाची छाप्तो तुम्छाची लचाये ।
ओगोलुम पेर्तो छाम् येन्तोछाची ओसेप्ची नयुतो,
ओबुम्ची मिन्तो लै लहै पिक्तो सानीवा छुयुतो ।
इनिक चाक्चाकुरपी...
इनिक चाक्चाकुरपी,
येलेदाङ फात्तोलो,
तानीव खोलोङ,
चोङ्खिदो तेल्म,
ई सुक्वा–दुक्वा
ई नम्वा तुम्वा,
पयाम्के माका,
खोलो खोलोवाङ
इक्दोङगोपी,
छुम्सेम्पा,
आसा–आसाची मम्सेम्पा,
खोलोक माताम्ना,
हायाम् रमाइल मयाम्के,
इनिक नीङदोङ फाइम,
मिनारी दाचाम,
चाक्चाकुरपी ।
छेत्नुम्क मिस्सो खोलाङ,
इयानुम्
छेत्नुम्नोदो तन्तो–तन्तो,
महाकुलुङ चोकपिका,
उम्बाल–बाल बान्नीव,
आम्नी सानीवा मिन्नीक,
हाम्चाम–पिलम्,
आम्नी सानीवाची तात्नुम्व,
इनिक नीङदोङ फाइम,
मिनारी दाचाम,
चाक्चाकुरपी ।
मास्चाइक इमि
इरिदुम होदुम,
सम्सुर्म छुक्
इरिङ–इसाकुम्बु,
दानाची हन्ना,
सम्सुराम केइया,
खोलोकङ पयाम्,
खोलोवाङ पयाम्,
चाइबाइची मयाम्,
तानीव माका,
खोलोङ–खोलोङ,
चोङ्खिदो तेल्म,
इनिक नीङदोङ फाइम,
मिनारी दाचाम,
चाक्चाकुरपी ।
देच्छा पकोलो...
देच्छा पकोलो ओमा सोङ्वा ङिदितु,
नेव पक्व पिक्तो पिक्तो हुक्पी किदितु ।
सोङ्वा दुङुना छाम्तेइ छाम्सिङ कियुना,
पढेइ मुउ कोङाने हायाम हायाम छापुना ।।
जा चोना सेस्मोखिम् खातो ओबुम्चिका,
सेस्मोखिम्पी नतोछा तुयीका खोलोस्का ।
नप रिङ इम्चिम्पा जिजिस वास्सो लम्पासे,
युपा छुवा घण्टी का खन्का खिम आइम्पासे ।।
युपा आर्नी चाम्पाना वास लस खातो नाकपा,
दावा आत्तो ओखिम्ङा ओमा काछोक्साकप्का ।
हु लोङ नतो सपुना पढेइ मसची तुवोसे,
युपा जा चाम्काना कोङ्ने नतो इम्सोसे ।।
सोङ्गेर ...
कोङ सेपा ओेतुस्कोप तुवोचोयोलो
लाम्स्को हाम्ला, गोदिलाम्पा तुयो,
कोङा नतोक चिमा तिइपचाप सोङ्गेर
कोङ खोतो, कोङङा चङोचोयो ।
कोङा तुयो सेपा तुये नाम्तो उम्हाल्ला
खेना नाम्छोवा नाम्तो तुलोक,
कोङा तुयोनो देई लामोसो, खोङोसो
हारई खाते हा खोदोलोक ?
ओसानीवापी मिनुचोयो उइनाई मास्कै
खात्लोन् मााका ओपिका तोम्तोम्,
बिन्निपा कोङ्तङ्क छाछास ङायो
चोस् खाते बिन्नी चारतेल होम् ।
हुङयोउची हुरुरु ........
हुङयोउची हुरुरु छेम्सीमी उम्गोपी,
सेप खुर्तो खुरुरु खाइम्दोम्पा तोउखम्पी ।
बेथोस्ची वेतो बेलोस्ची वेतो खाइम्पा गास सिङ्पी,
ताचाये हायाम् हाल्लोसो ओमी सानीवा गोपी ।
सेप नोम्पा ओसुम् लतो हिक्वास्कोप तुम्दोम्पा,
लाम्छिनी लाम्दुम्वा खात्तो तितिगिस बिम्दोम्पा
पातल खाइम्पा लाम्चाम् खुर्तो बनाम्ची बतो छा,
छाम्लतो सोगोप तुम्तिम्पा हायाम् पीःमेसची कल्तोछा
तेल् खिम्मी मिमा सानीवा खापे, तोम्पिङा तुयासो,
मान्माइङा तेल्पोस् बुम्नेछो खोलोङ कोङाने देइङासो
तेल्म लाम्तो सित्त मम्पा मान्माइस्फो बुम्चासो,
सै सै मम्पा बजार हेम्पी मिन्नस्फो बुम्चासो ।
अतेल्पी तुम्ना...
अतेल्पी तुम्ना, हायामनप छुम्ना तेल्सो नप ममछुये,
नप रिङक युम्ना, होप्तोक रिङक हन्नाने होम्छुये ।
दी दुमो दुम्ना लाम्होम् दिमतिम् ङालीये ईसेसे,
ओन्तो नप तुया होप्तोक छुया दुमोङाई चाइसेसे ।
मिस्मी मुक्स्पीसो खोलोङा केइने नपङाई छुम्छुये,
नप रिङक युम्ना, होप्तोक रिङक हन्नाने होम्छुये ।
तेल्गोपी ईमी लोङ थुइलम् हन् खोलोवा होक्सियाम्,
दोस्पा रीङ मम् छुनो मिस्मी ईलकङा मम्खीयाम् ।
पढेई छुक्तो बिन्नी खाइम् छुनो ईतेल्पीङ तुम्छुये,
नप रिङक युम्ना, होप्तोक रिङक हन्नाने होम्छुये ।
इक्लेची तुम्पा...
आनासो नतो कोङासो नन्ना उसो लोमान्लमोङ,
होन्युलमबोक्सा तोम्पी छुम्बोक्सा उसो लोमान्लमोङ
इक्लेइची तुम्पा नीस्लेइची तुम्पा कास इतो ईदेप्पी,
गेतोछा तुम्पा नेन्तोछा तुम्पा युलम्पा चउगोपी ।
होन्युलम बोक्सा, मान्यु ल तेक्नो तोम्पीङा छुम्पासो,
उतोमुत्ताई सानीवा बाइम्पाइ जिस्ङाङ तोलम्पासो ।
सम्तुमा उये नइलम उये आनाङा ईयोक्सो,
आम्होप्ने खाता कोङ खोतो–खोतो सानीवा दयोक्सो।
ओहाल्ला कोङ तुवोचोयोसो आन्ङाये मिन्चायान्,
आनाक उची कोङाने आन्ङाई सानीवा पिन्चायान् ।
गजल
मिक्वा मत्सो दुक्वा मत्नो देई खाप्यासो एउचे,
मम् बोक्से चाम बोक्से साम्आ साप्यासो एउचे ।
अमेरिका मिन्तो नेपालपी खाप्याना छुनो फो,
खाइम्ङादो खाइम्छुये आसा राप्यासो एउचे ।
मिस चिरेपदोसो ई सानीवा रेप मम्छुये,
लाउरे कायाम्नोथे के देई थाप्यासो एउचे ।
पापसानीवा युम्छुनो नप सानीवा होम्छुनो,
नप्ने नप्ङा हलेसी लुङपी हाप्यासो एउचे ।
गोपा योउ दोसो थेम्पी काङ जेजे माम्दोक,
केईसो लाम्लैया बिन्नीपाचा लाप्यासो एउचे ।
गजल
हायाम् दुक्वा मम् बोक्सो खापोनो हाल्लोसो,
तेल लाम्लइम रिङ मम्आ सापोनो हाल्लोसो ।
ओ फपतेल्क महाकुलुङ पिल्मोस मियो खोलोवा,
ओ जात कुलुङ बिन्नीपाक छापोनो हाल्लोसो ।
लाम् दुमोलो लाम खोङो रिङ नेनोलो मिन्चियो,
उम्दोना छोक लाप्सेप रिङ वापोनो हाल्लोसो ।
ओतेल् मेक्तो ओतेल्पोस् मेक्तो–मेक्तो खान्चानु,
लाइस्पा खाइप मिस् कोङा रापोनो हाल्लोसो ।
दीः दुम् चलन तुथे इमी छेलाम्पी–देलाम्पी,
दुलेसाम्दो दुम्छुये कोङाक दापोनो हाल्लोसो ।
गजल
पावै–सोत्तो, छेस्काम–गुदेल खेना बुङ इबुम्ङा,
महाकुलुङ तेल केइ खोलो कुलुङ इबुम्ङा ।
इ फपङा इबुम् इमम्ङा इबुम् इक्छाङा केई,
सियातोलो छोन्चिस्को पोम्लालुङ इबुम्ङा ।
पिल्मो–नाम्लु,छेम्सी–ताम्सी सोत्तोस् उदोसो,
तोस्ची मान्लो दुपाम्क झ्याम्टा पुङ इबुम्ङा ।
इ रिङ खप्प इमी रिदुम खप्प, चारतेल खप्प,
लोनाम् ताइलो खोलोवा थाम्पा चुङ इबुम्ङा ।
चाइबाइ खपाम्ना सानीवा इक्काम मयाम्,
इ तेल नप माम मिइप केइङा दुङ इबुम्ङा ।
गजल
अरुण योउ कयाम्कप्का महाकुलुङ छेतुम्खीयाम्,
दुधकोशीङा तयाम्कप्का महाकुलुङ छेतुम्खीयाम् ।
अरुणका एक्तो योउनालो नाम् काम्स्को हेम खोङाम्,
संखुवाछोक्पी नयाम्कप्का महाकुलुङ छेतुम्खीयाम् ।
दुधकोशीपका नाम् आप्स्को हेम् खोङाम् इतेल,
हुङयोउङा पयाम्कप्का महाकुलुङ छेतुम्खीयाम् ।
महाकुलुङपी तुप केई मिचा आन आसे लैयालो,
कोङ कुलुङ लयाम्कप्का महाकुलुङ छेतुम्खीयाम् ।
ई चारतेल इबुम तुवाक सुक्भौ मियीपी दोसो,
केइया उक्काम मयाम्कप्का महाकुलुङ छेतुम्खीयाम् ।
गजल
दालोसो मास्यानो इहोप्मी इरिङ छुदो,
केईसो खोलोवा रेप्या नप इ नीङ छुदो ।
इतेल् थेइम इहुक्पीङा नप लक माम्दो,
इलक् आङ् मेक्तो खाया इलक्पी थिङ छुदो ।
नेइम रिङ नेइस्कोपी नेन्या दुमोक लोयाचिनो,
मिचासो लेतिखोङ्या गम्गम्पा इखिङ छुदो ।
लाम्लछा छुम् लामाम्दो सार्दाम्सो छुम्छुये,
मिसो नतोछा तिते हार्प सिङ छुदो ।
निउ मास्खाते रिङ फुतुम्ताम सेतिखियालो,
नतो मिम्नाके उई छये दुमो लिङ छुदो ।
गजल
हिक मान्केल्मोङ सिबोलोउ तोक्से अन्पी,
खोङुम्चायाम्दो उउङ् तोम् बोक्से अन्पी ।
आस्लोसो मोलो गेन्खासो मान्न रीङ फसे,
खोलोमी रीङ पोप्तीप मिस्ङा कोक्से अन्पी ।
छाक्काङ छुया अ तेल खोङुम्चायाम्लोन,
उम्छोना उम्दोक छुम्मान्छुम् छुहोक्से अन्पी ।
हेप्पा रिक्स्या हेप्पा चप्स्या हेप्पाक दाप्स्याची,
नेनितित्यादो उउङ रीङ्छाम् थोक्से अन्पी ।
हेप्पा थेत्या हेप्पा हेप्या हेप्पाक लोङ थुत्या,
मिस्ने उनाउपिई छुम्मान्छुम् छुछोक्से अन्पी ।
गजल
चाक्चाकुरपी बानोलो मि जुइम्पा मिनुचोयो,
मि जुत्तो सानिवा इदेप्पी छुइम्पा मिनुचोयो ।
वात मतो गेतो खिम्नाम तईलमपालो,
ओ फेंगाम् छो ची हुइम्पा मिनुचोयो ।
ओङोबोपा खोङोचोक ओदोलोतोङ लोयो,
इल्पोम्आ आर्को चउ खुईम्पा मिनुचोयो ।
मान्युलम छुनो तोम्पी छुचिसो कास लोलम्पा,
होन्युलम्पालो झिझिर्वा कुइम्पा मिनुचोयो ।
आम्लास बानो उलेइ ओ खिम खात्ची माका,
तोस्खम्पी नित्ची लुङ तुईम्पा मिनुचोयो ।
गजल
नावादे खातो, अन्वादे बानो तोन्ना आन्ङा,
छुबुरी तुवोचोलो सेमोपासो खोन्ना आनङा ।
हायाम् सर्पलो तुम्पा नेइम्पा दोसोङा,
उरो उरो दुङनपकक इलपो सोन्ना आनङा ।
बुम्चीका नेइम्चाम्पा गेम्चाम्पालोसो,
नेन्तो–नेन्तो खातोलो दालोसो पोन्ना आन्ङा ।
ओसानीवापा आम्ङाली ताचाई सेपा लेपा,
सुम्नीमा पारुहाङपी सानीवा ङोन्ना आन्ङा ।
मिन्तो मिन्तो खायुलोन् कोङ आन् नैयान् होगो,
गोपा रीङ मान्युङा एसेन नैयान लोन्न आन्ङा ।
गजल
ङोक्तो चाम्काक खेताम्कङ दुङ नप,
खेताम्कप्कासो केताम्कङ दुङ नप ।
हिक्पी उसो मान्लेइमो चाम मान्तु पिक्या,
इलास्वा पोम्तिम्का लेताम्कङ दुङ नप ।
पी सेइमान्न पिके पीःम छास काउ दुप्चा,
इरिम्दुपिन् माका पी सेताम्कङ दुङ नप ।
इरिङ रिदुम् मासे मासाम्दो छासे छासाम्दो,
जिजिस्दोसो इपोम्ललै छेताम्कङ दुङ नप ।
इखिम्नाम् नप मम्ना साम्फोरोछो काइमछुये,
इसाइकक सिलोछो बुकुर्छो थेताम्कङ दुङ नप ।
गजल
आना कोङ ननतोकची मोरोकफोसे आयय,
नतोयो पिक्तो ततोकची मोरोकफोसे आयय ।
हाल्लोसो इची सुर मइचु पिक्तो चयोतितो,
तुप्खाचिलो पतोकची मोरोकफोसे आयय ।
आनान् मिन्फो चयुम्चाम्लो उम्सानीवा हिक्से,
आम्पीका कोङ सतोकची मोरोकफोसे आयय ।
ओ चउने मोलो लुङतङ्कै तुये ओमिन्,
ओसानिवाला हतोकची मोरोकफोसे आयय ।
नइयान् पिक्चेते, मेक्तो खाइयान् ची पिके,
मेक्तोकाथेम् लतोकची मोरोकफोसे आयय ।
गजल
ओलोङलाची थुतोचोनी थुई दुर्नुम्दोक,
थोनपौये कोङ्ने उतानुम उई दुर्नुम्दोक ।
देई थुत्नुम् खोन्तोङ् लाइस्पा खाते ओलोङ,
नित्चीङ् ओलोङ छुयानुम् छुई दुर्नुम्दोक ।
कोङ्ने मोलो मिलाम्छोये पइपङा हुये–मते,
कावाची कुयाचेत्नुम आन्ना कुई दुर्नुम्दोक ।
ओरिङ् मनुम् ओलोङ् थुत्नुम् उसो पिकोनो,
ओसाम्लोङ मुतोनिते खोलोवा मुई दुर्नुम्दोक ।
गजल
गुदेलपाका बुङ खोङाम्लो ङाल्लये हायाम्,
खुङ्कगोपु हुङ खोङाम्लो ङाल्लये हायाम् ।
खिम्ची ङाल्लये चोंखिदोला गत्तेल हेम्क,
साम्फेलोउ लुङ खोङाम्लो ङाल्लये हायाम् ।
कुलुचिम तुस्को तेल् कुलुरिदुम मस्को तेल,
तोस् पी दुम पुङ खोङाम्लो ङाल्लये हायाम् ।
येनाम ताइलो गिगियो खे माकाई लिस आ,
येनाम्मा खुम् गुङ खोङाम्लो ङाल्लये हायाम् ।
इतेल्तो ङाल्लप हापिसो मान्तु विन्नी तेल,
इतुस्को माकुलुङ खोङाम्लो ङाल्लये हायाम्
ई पोम्खेर...
ए बुम्चे,
केछे–केछे हायाम् केछे
यालाखम– इनिबाक काठमाण्डु
हाङची तुस्को तुवादोङा,
हाङ पिक्याक राजा
खची चारतेल तुवा,
खची चारतेल्पोस् तुवादोङा,
पी केइपची तुवादोङा
दुङ लाइस्पी
पी केइस्को तेल्म तुवा खोरोलो,
खुङकस् गोपाल ची थे माका,
गोपाल तुवाथे लुक्स,
खसा उम मिस ताइप
मेस केइप तात्थेना
उम गद्धिपी युस्थे,
मेस केइपची तुवाचालो,
ताम्थे यलम्बर,
रोदुछाम् फपची,
मिनापोङ्खो हाल्कुम्बुला लइप,
खम्बुहोङमी उम्छास्
नेपालमी नाम्आप्स्को हेम्ला लताताथे,
यलम्बरमी ङेर्ची तुवा हायाम देतो,
दुर्सेसेत्ची मेस केइपची,
खची राज तोक्स्ची
हाङ छुवाना,
हायाम हायाम तातो,
१००० दोङपिका दुङ देतो,
तोक्स्ची खची राज,
खची चार तोक्स्ची,
चारतेल चाइचची हायाम् नतो,
खोरोलोई उकलेई भारतमी
बैसालीलाम्पा,
‘लिच्छवी लोन्चीपची,
थोङा खची ङेरलो,
खन्बाइमा,
‘गस्ती तुवा रोदुचीम् हाङ,
कल्लात्ची रोदुची,
‘जयदेव छुवा हाङ नेपालपीक,
यालाखमपीका जुम्तात्तु रोदुची,
नाम्आप्स्कोहेम्ङा आत्ता,
खुवोलङ लत्ता,
खुवोलुङला,
सोगो छुक्तो
मिगो छुक्तो
खची चारतेल् मतो
राज मतो खात्तो
मतो चातो तुवातिता,
तुतो छातो खाताकप्का,
हेप् इकहेम्
हेप् ख हेम्
हेप् हाक हेम्
मन्ची रीन्ची,
खची राज्य
किन्तो मतो खाइची,
खुवोलुङहेम्
छातो खाता,
रोदुचीम् फप
१० जना छुवा,
होहोप्तो हान्ची
खन्गोपीका
ईनिवाक रावा
खोटाङ छुक्तो ई फपची
एक्तो योउना हेम् थोङाथे,
खन्पी लिक्पो ईफपची,
छेम्सी–ताम्सी–खप्दुलु–राताप्खु,
हुङयोउमी बरबार थोङाना तुवाथे,
छेम्सी तुवाथे छेम्सीपी,
ताम्सी सोत्तोपी,
खप्दुलु पिल्मोपी,
राताप्खु छेस्कामपी,
तुवाना खची हो–होप्मी,
लक मतो तुवाचालो,
सोगो दाम्रो चेन्तो,
बाई मतो तुवाचालो,
उकलेई
ताम्सीलो राताप्खुलो
तुपाखात्थे,
खची चार बाइम
लोलथे निप्पोस्
अउ आउ छुवाना
राताप्खु सोत्तो
ताम्सी छेस्काम
खाताना तुवा,
हुङयोउमी बरबार
तुतो छातो मतो चातो
खातालो,
खोलोमी खची रीङ,
ईबुम छुवा,
खची चाम खाम ईबुम छुवा,
खची चार ईबुम छुवा,
खोरोनाङ तुवाचालो
उलाम् ईल्पो
खाल्मी फप
नुक्काला एकतो थोङाथे,
आसाईये कल्थचीकइथे,
सोगो गोला थोङचालो,
वाम्मा सीयालात्थे,
काउ लाम्तो–लाम्तो खाइलो,
ईबुम् लुङपी,
काउ तामाक छिप्थे,
ख काउ दुङकप्का,
लुङपी काउ तुस्को तले पिकाना,
कु–लुङ युक्स्थे,
चारमी नीङ,
खोलोवा खोलोवा
कुलुङ पिक्तो खातालो,
अन्पी तुप्ची कmुलुङ छुवा,
अपिक रीङ कुलुरीङ छुवा,
अन्पीक रिदुम् कुलु–रिदुम् छुवा,
अ चारतेलमी निङ
दोस्पीक
महाकुलुङ छुवा,
सोत्तोस, पिल्मोस, छेम्सी, ताम्सी
नाम्लुवास मोलो ईबुम्ङा,
अन्पीका खोलोहेम् खाताकस्
छासाकस्
खोलोङ कुलुङ छुवा रोदुगोपीक........।
मिस्मी दुङ........
बुङ बाइयकलो मिस्लो इबुम्ङा,
बाइय एसे यमे देसाङा
नाम् आप्पकलो मिस्लो इबुम्ङा,
आप्प देच्छा कोम् लिप्प युपाङ ।
पयाम्कतोङ्सो छुनो तयाम्कतोङ्सो छुनो,
छुकतोङ्ङा छुये,
लेतिचायेदो खोम्तयाम् उ उङ्
छुम् मान्छुम् मिस्मि छुये,
खात्क योउलो मिस्लो इबुम्ङा,
आत्नो देई हुङाम्सो,
छुखात्क रीङ, गस्खात्क रीङ,
नप छुनो देई पयाम्सो ।
एसेक देसा, देसाक छिन्दी छुक्तो,
मोरोङ तुयीचायादो,
उना उपिङ खालेते इदुङ,
ओरोना नई पिक्तो तुयीचायादो ।
होल हुइतोलो लोनाम ताइलो,
हुप्स्ना खाते सिछोम बोउने,
एसेक हायाम्क लोप्चीप्सो,
गस्खाते ङाली सउ मासे उलेइने ।।
गोक्तुलुस...
केछे ई माकुलुङ पी,
मालो नेपालमी ङेर्ची,
गोर्खाली सेनाची,
ई चारतेल् हुक्पी मस् बानाथेलो,
इफप पाचा मा मिनाथे, मा पिकाथे,
खची हुक्पी छुम्खामा ।
इल्पो ङेर्मुत्ती मिचिक,
गोक्तुलुसचीम् फपसोई तुवाथे,
‘मन्तक ङेर्ने एउचे... पिकाथे ।
खची छा माइक,
खुलुम फुत्चीना दोक्खम् मस्ना,
युस्चीथे, सुल्चीथे,
तोक दोक्खम्माप्तोका,
नुक सेस्कोपु,
तुप्री बेइया,
ङेरचीन्
आप्सेत्चिथे ।
खोरोलोई,
ङेर्ची दुमोङ् सर्प,
खची बन्दुकलोक योक्खाताथे,
मान्दुर्स्थे तेल् आ,
खेना क,
नुक बुलतोसुम्मी दम्माइपु,
ङेर्चा बात्ल मस्थे,
खोलोङ् तेल्पोस्ची,
पिकाथे, ‘तेल्पी इल्पो देप मिस छुये,
खुङ्कम् निङ राई छुये ।
खोलोङ तेल पकाना ताथे,
गोक्तुलुसमी फपआक,
पेराङ््गापु खिल्ये युक्स्ना होक्स्ताथ्थे,
उम्होप मान्खाइथे,
ङेर्ची छुलीया पुङ छुवाथे,
उतो खेना पतेइ मान्मम्पाई लोलथे,
अ ङेमुत्तीम् छास गोक्तुलुस् तोदिक,
लाम्तो सेताम्के लोलथे ङेर्ची,
लाम्तो सेत्चीथे,
इल्पोसो मान्युप छुवाकप्का,
गोक्तुलुसची खोलोङ,
कोम्लीम् जुकाथे,
इल्पो मिम्छा,
तुवाचाथे तेल्पी,
उम्गोपा छालोक...।
गोक्तुलुस् खोलोेङ् मताना,
आत्ताथे ङेर्ची इल्पो राई युक्स्चीना ।
खन्का दोस्पी ,
केछे उम्गोपा छा लोक मामा,
छा वात्थे,
छासाक छास्क,
गोक्तुलुुस् छुवाथे ।।
कास हन्ना.......
चाक्चाकुरपी मान्बाइङालो,
नोबोेयेइमसो मान्मङालो,
हायाम्ङाओ खेना,
आम्सानीवा इसाखाता,
मोन्तोमुत्ताङ हाई चाइस्खाता?
कोङा मिन्चान्नासो,
चाक्चाकुरपी तुम् लोलम्पासो,
तुम मान्दुर्ना कोङा आन,
ओसानीवा मिन्चान्नासो ।
हायाम् आम्पी नोबोयेइम मु,
‘स्वीच अफ पिका,
आनासो मथे,
कोङ हापी हापी तुवोचोलो,
बिन्निपा मिचा पक्थे ओ फोन,
आम् चारेत्ताफो,
खोतोदिपिङ ओ आना,
आम्सानीवा हिक्स्खी?
आम्सानीवा खार्खी?
कोङ आम्मीमा सियोना,
आम तुप्स बाइम मिनो,
आम लास बाइम मिनो,
कास ने खेना,
अन्वादे नावादेक छुवाची,
आन्ने,
बिन्नीपाम्ये छुवाखाता माका,
ओदोङा इचिम् सम्तुमा मिलम्,
सानिवा पिलम्,
ओदोङा होगो ।
इल्पो कुलुमे तुये.......
आन्मान्दी कोङ,
काउपिका लाइम्दीम्पा,
उम्सउ केल्पचाप,
ङा तोङ्क छुवो ।
पिक्तो कोङ सम्तुमा मिपा,
इल्पो कुलुमे तुये ।
उम् मुक्स्, चिमासो मा, देप्पासो मा,
रेप्पासो मा चिरेप्सो मा,
ङाली हायाम् नप,
हायाम् नतो नेइप,
इल्पो कुलुमे तुये ।
आना हार खायोसो,
आन्लोदोन् खातोचोयो,
खाप्मीयोदो खापो,
गेमियोदो गेसो,
दुक्वाङ मम् बोक्स्सो,
आन्लोदोन् मुचोयो,
पिक्तो कोङ नइप,
इल्पो कुलुमे तुये ।
नाम्तो दाइप ओन्तोदेतो,
सोङ्गेर्हाम्तो इबुम् सोङ्गेर,
दुङनप सोङ्गेर इबुम् तुक,
आन्ङा ओमी, ओमी छुवाचा,
पिक्तो ओसानिवा खाइप,
इल्पो कुलुमे तुये ।
होदुपी तुम् सो तोम्पी छुम्पा,
सेमो होदु आन्ङा मिइयान्,
होदुपासो सेमोपासो दानासो ताव,
पिक्तो ओ काछोप,
इल्पो कुलुमे तुये ।
ओ चउआ दुरकतोरो,
ओसानीवापी वान्कतोदी,
आन्ङा युन्दीयान्,
आन्ङा मिन्चायान्,
दावाङ ओ तुप्स ताव,
पिक्तो खाप्,
इल्पो कुलुमे तुये ।
कोङासो ओ सानीवाम् उम् गो गोपी,
चउमी गो गोपी,
युक्सुतोक खङाङ,
हाल्लोसो मिनुचोयोक,
इल्पो कुलुमे तुये ।।
एकलव्य ...
हायाम् दुक्वा मतो,
जमुना योउ क ना
हस्तिनापुर पाक,
सोगो, दाम्रो, योउ कोक्तो,
नार, मोक्स्, खुस्पाम्,
मुक्स्पीका सुल्न्चीतो,
सोगोपाक लुदुम्सी चातो,
लोङ, हुपीका फालालाऊ
ही खाइपचाप,
उम्तेइसोे चेइपखाप,
सोगोङाली वोपखाप,
खोरोलोई छेङछेङ्यो नाम्तोङ्क
ङालीलोकः एकलव्य ।
उम्चुप्ला लिफु, उम्पाङ्ला बेई,
बोतोपी वेस्दीत्ना,
द्रोणाचार्यम् खिम् तालाता ।
तखिचिलो खोलोमी मुक्स,
एकलव्यपा थुक्साः अर्जुनमी, आश्वत्थामामी,
इन्चान्चीक तुवा बेईलिफु तोम्,
एकलव्यआ तोङ् कुप्सु द्रोणाचार्यम् लोङ्पु,
सेवा छलातु ।
हापीकाई ता? आसे आन्? ल द्रोणाचार्य आ,
कोङ इल्पो रोदुम् छा, जिजिस लेसो ओ होपा
इयोते आना हायाम्,
बेई लिफु तोम् ।
द्रोणाचार्य उम्चारेत्ता,
रोदुम्छा इमान्न,
खेनासो आन्ने हाङ्मी छाई,
ओखि चार ङाप्याका देसा,
हायाम् लेसदो तोम ।
एकलव्यआ उम्लोङ लाप्ना,
कोङा उसो मोनो आम्नी चार पिक्तो,
कोङ्सो आम्सेस्मोछा मोते पिकासोमा,
आत्पोक्सु द्रोणचार्य आ, इल्पो बाहुन आ ।
मास्खाता एकलव्य,
सोगोगोपा, लुबम्गोपा ।
हायाम् दोस्पी,
हायाम् ईचीना द्रोण आ,
उम् सोलोची पोक्स्ची दिबुसा पी,
खोम् तुवा खमी देई ईन्ची ।
लाम्तीत्चीलो दिबुसा,
सोगोहेम् खोलोपी,
लुबम् गोपा उची तुप् बेउ तची,
खची बेई लिफु हिक्स्ची खहेम्,
सोङगो लुङ्गो गोपाका लताबाना एकलव्य,
बोहोम् द्रोणाचार्य युक्स्दीतु दोक्पी ।
दा्रेण लो बिन्नीपा इप्चीप्लो तालाता,
युक्स्ची एकलव्य आ हायाम् नतो,
सेवा छची,
पिकाः आन् ओ ईप बेई लिफु तोम्,
कोङ् तोम्पी तुवोनासो,
आम्मी खोतो इन्चीङ,
नेव ङोक्व उई पियान्,
‘गुरु दक्षिणा ।
वाताम् गेसा द्रोण,
उम्जीनतो उम्गोपा,
पिकालाताः नेव पियोव दुरदो,
पियोदो आम्चुप्लाक थत्ती...,
मिनो, आम् थत्ती मान्दी,
तो मान्न बेईलिफु,
पिदुरोनो फो आम् थत्ती,
दुरयो ?
बेथो लातु एकलव्य आ,
खुई रुप्दीतु उम्थत्ती,
द्रोणमी लाइस्पी युक्सु,
कोङ रोदुम्छा,
पिम्ङा बोक्स्सो सोम्ङा,
उसो मिनोनो,
हि खाता फालालाउ,
मुक्स् नेप्खी मिक्वा आ ।
ओरोना केई,
हायाम् गोङ होकुवाप् रोदुछा,
जुक जुक पुका,
एकलव्य छुयी,
ई थत्ती मान्दी छुयी,
ई चार मान्दी छुयी ।
ओरिङ पोम् पिको...
खिम्पिका लत्तो
जिस् मेक्सा खातो
लाम्छापी तुये उम्खीम्,
उम्तोसम खित्तोछा
लाम्स्कोपी तुचाये
नाम् आप्प तोलो,
ङाल्लप्छा ङेसे
लालीमा तोङ,
उम् ङइम छा लये
कोङ तोखोयोलो
कुप्स्खीय उम्ङाली,
गेतोछा उम्मुक्स
ओहेङा हिक्स,
झिझिर्मुक्स आ,
कोङ खोतो गेस्क,
दुमोङाई सत्ते,
नतुसेतो से
खोरोलोई आय,
कोङा नतोक
छेत्तनो खसा,
नेइम्ङा नेन्नो
कोङलो हाल्लोसो,
उम्ङइम लइहो,
एस्पाक कोङा
उम्बुम्ची तुपु,
कोङा खचिपी
ओरिङ ची पयु,
कोङाने पिको,
मोरोना माका
मेक्साका मम्चीम्,
नप छुनोकैके,
देसा युपाक
लन्नुव माका,
कोङलो उम्तम्मादोक
उम्नेइमादोक,
कोङाने मोलो
तुम्खाम्ये मिनो,
तुम्नासो मोलो,
उम्नीङछा तइमा,
ओगोपी तुक
ओरिङची कोङा,
पोम्ङाई मिनो,
देसा युपाक...।
एस्पा सेपा...
‘एस्पा सेपा
ओसेमोपा
कोङा आन् खोन्ना
केछे लाइस्पीक तोङनाङ,
आना ओसेमोपा,
मि खप्पु,
कोङा खपुलो सियाखाता,
आना खप्लो धिरिरी तिता
नाम् काइपतोङ मन्ची...,
कोङ थितोपकोलो
योक्सोचो, हुवा मियोचो,
आय खोन्तोङक सेमोन
रुबुसी सेमोथेइ मोलो
आना खप्लो तिता
को खपुलो सिया
उइ छुवाकइ
आना कोङ
होम्न्येम्ची मिन्नोको?
हायाम ओ किम्मा,
एस्पाकलोन्
आना ओ सेमोपा मि खप्क,
सुक्लाम् छुवा
खेना आना कोङ
होक्सीयोनोको,
मोन्तोमुत्ता
सानीवा पिलम्पाना
ओन्तो तातो नइलम्पाना,
होक्सीयोदोन
कोङ दाई मन्चीयो,
ओसानीवापी आन्ङा
युन्नाकइके कोङा
आय बाबु...।
मोरोमुल...
केछे–केछे,
हायाम केछे
जुन्जुलुपाका
इनिवाक जुभिङलाम्का
इल्पो खाल्मी छा
थामताथे, वामताथे
पिल्मो तेल्पी तुवाचाथे
तेल्पोस्ची बोक्तो हिन्चीतो,
तुतो तुतो खातालोन्
सोलो छुवालोन्
उमसुर मसी बाइयु,
खेना अ मिस
उम् खिम ना नाम्क
छुवाक मायो
लोलथे तेलपोस
खोलोवा ताना तत्चीथे,
आन् आसे?
आम्खीम् हापी?
उस्सोङ मान्पीथे खोरोलोन्
मोरोङा मोरोङा पिक्तो
तुवाचाथे,
आइ, पयनो होगो,
उमनिङङा मोरोमुल युक्साम्
लोलहो खोरोङ मस्थे,
खेना हन्ना
ई पिल्मोछा छुलोन्
उम्दप्स्नीङ छुमछुये
लहै माका
दप्स्नीङ मियाम् लोलथे
पापाची तेल्पोस्ची
दप्स्नीङ वात्लोन्
खसान्, मोरोमुलआन्
मेस सेत्लात्ना
ङायुखा तोक्स्लात्थे,
तेल्पोस्ची लोलथे
अन्सा आसासो मान्मक
ममान्दुम्र्पाङ मक मायो,
खोरो उम्नीङ रीसाक मायो,
खोरोदो जुन्जुलुपा बाइप
जुन्जुलु कुरिक्सा,
तेल्पी नीङ तोप,
निङवारी लोरिसा,
युक्स्चीथे दप्स्नीङ
ओरोनाङ मोरोमुल
छुवाथे पिल्मोस।
पोम्लालुङ...
दाम्फेआ लेत्याना,
मोसुमआ लेत्याना
दाप्लोआ लेत्याना,
तुस्कोआ लेत्याना,
खारुतोउ आ लेत्याना,
सोमोवा दुङ लइना,
सारीमा दुङ लइना,
सुम्नीदुआ–खेरेदुआ
दुदोयाना,
खावामा मुवोछा,
खोरी मन्चीयातोलो,
खोतिन्चीयातोलो,
पालाम्, फपलाम्
कलुम्खीयाम्लो,
दाम्फे, तुस्को, दाप्लो,
लाम्स्को छुक्तो,
चारिदु, कोलाम, खिसोरो,
सोन्दोरे तोरोखा,
छाङकिम्मारी छुक्तो,
बुसीबुचार, हुलीमाचार,
ताम्नीमा, सोबोलुछो,
सोन्चीतो खास्को,
ई पोम्लालुङ,
महाकुलुङमी गुदेलपा
कmुलुचीम् खोलोमी,
सोत्तोस, पिल्मोवास,
छेम्सी, ताम्सी,
खेना नाम्लुवास,
खोलोमी लाउ छोस्को,
पोम्लालुङ,
ई ‘स्वर्गद्वार तुये,
खोलोवा केइया,
राप्तो, थोक्तो,
खाइम तात्त,
केइया मोलो,
इनिबाहिकाङ,
रापुक्साम्नो,
चपुक्साम्नोदो,
केछे ईफपपाचिम्,
दुङपिकाङ तोक्साथोङक,
ई पोम्लालुङ मासे,
आम्नीम् उई तुये,
मिचा लैयालो,
उई खोमाम्?
ईमी ई छेइन्चीस्को,
उई तुये पिक्या?
युपा छुये ...
युपा छुये सेपा छुये लालीमा खोतो तुवोचोयो,
आमङाली मिनो आम्मीमा सियो ओहाल्ला छुवोचोयो।
आम्साल्म्छा येनो ओजिची नये हायाम्–हायाम्,
आन् मेक्सा मन्ची तोम्–तोम् वाताम्–वाताम् ।
ओचउ तुके आम्मीमा ताइलो उइ छुये उइ छुये,
आन्मान्दी कोङ उदानाई छुवो ओचउपी आन् तुये ।
लालीमा खोतो आम्ङाली मिन्तो देई तुमा कोङ,
कोङमान्दी आन् आन्मान्दी कोङ आनासो मिन्खोङ ।
ओहोप्क अन्पी सानीवा आम्पी दुरोनो हन्ना तुम्,
आम्ङाली खोतो आम्साल्म येन्तो तुनुव सिम्खाम् ।
कोलाम साइबर क्याफे...
इम्स्नो हाल्लोसा, इबुमे सेमो,
....कोलाम्पा साइबर क्याफे,
खेना, भ्यू टावर मी
मा, इम्ङाइसे इम्स्नो,
इक्छीनछासो,
दानाई इम्स्कै मोलो,
तयकप्का नाककप्का,
नेचालाम् मुुक्लीकोम् हेम्क,
गिगियोक ङाल्लप तेल, कोम
पिप्चा पिक्दोङक,
...स्वर्गीय आनन्द, पिस्को ठाउँ,
अन्पीङ्नी माका,
मादोक, नुक दुमोङ ङाल्लप हुङ योउ
ङाल्लप हुङ् भ्यालीङ तताम् माका
‘अनुपम दृष्य पिक्याक,
अन्पीक ङाल्लस्वा रिङ,
पोम् लागिङा बानेइमम्पा नि माका,
पूmर्गेल्जे बुढा आ पिके,
येन्नुम्व, ओ घोषणा,
इबुम ङाल्लप साइबर क्याफेमी,
कोलाम साइबर क्याफेमी,
छुके, इबुम साइबर,
छुके खन्पी क्याफे,
कफीलो नेट लो,
मजा छुके,
येइपआ मान्तोक,
तोप्आ मुक्स् मान्हेक,
बानेइमोके कोङ अ ठाउँ,
चउ, हुङ् भ्यालीम्
यही ठाउँ बनाउने छु ।
विश्वआ मम यातु
द्रोण आक्रमण,
क्षेप्यास्त्र परिक्षण,
मंगलमातो मिस तुस्को सेमो मोम् यातु,
मिस्मी रोवोट, रोवोटमी मिस् छुम् याता,
खोरालाई,
ओ तेल,
हाप्दीत, सेमोपा,
बुल्टोसुम–लाम्छीनी,
लाम्दु–लाम्दुवा,
आसे दुङ लम,
बेइमदीलम् मान्दीलम,
छुचाये कम्पीटिसन,
दुम्, पइलम्,
खोम् मान्तोमोङ तुये ओ तेल्आ,
फेसुबकमी तेल,
इन्टरनेटमी जादु,
कोलामपा झोलोङ तयाम्ना दिस्या,
तयाम्नो खोरोलोई
तेल्पी हायाम्क लोन्चिप आ,
तेल् नप मम् रीङ,
जमाना वाईफाई लाम्पा,
वाई म्याक्स पा तातेका,
मान्तोमो तुये अ तेल आ,
फेसबुकपी फेस(ङाली) उम्बुम्चीम्
पढेइमम् मान्तोमोङ तुये,
सोलो सोलोमेचा फोनपीक,
बुम्चीम स्टाटस्
नेइम मान्तोमो तुये
आसासो स्काइपपी
विदेशपुक छा लो, बुम्नेछोलो
मान्इम्प सेमो,
ख सेमो होदु मम लागि,
युम् छुये साइबर,
तोम्छुये क्याफे,
निङ युम् छुये ‘कोलाम साइबर क्याफे,
वाइम छुये इबुम् होसोङ महावीर पुन
म्यागेसेसेम् लागि मा,
कोलाम साइबर नेटमी लागि ।
सेमो खेइमतो बोबो कान्छा...
सेमो खेइमतो सेमो खेस लामदुमाक बोबो कान्छा,
ओरोनाङ हाल्लोसो, दुङ दुङपुका,
खेत्चय सेमो ओरोनाङ् भारीलो, डोकोलो,
खेइमचय सेमो भारीलो, सेप्लो,
हाम्लोवाप जिरी जुत्ता,
हेप्लो खाली खुट्टा
५ हजारमी हाई एक्तो,
लाम्मान्दुम्मोन् कुइरेम् भारीलो,
देत्छायुपा हु ङ तुप्नो
हु ङ ङाङ दोने मोलो,
पाँच भाई छाचीम्
पढाई मासे, भविष्य मासे,
केछेवा तेल्पु नाघी छुवालो,
दाजुभाई खेम्पालो
पिकोक तुवा,
ओदेप्मी माइला,
आन् आपुताली...
मिम्छाचीम् खानी,
कोङ् आना एसे केरोते,
ओमीन् आन् ठीक मप ओ छास् तुये,
पिकाना
खुङ्क ओ वचन ने मोलो,
ओ छाचीम् पढाइ आये,
दुर मोलो,
खोरोलो ने मोलो,
दानाई छुये मान्खुर्मो भारी?
नइदोइ माका मान्खुर्मो टे«किङ ।
खोन्तोङ्क रीङ् मिन्तो,
चिमापुङ बुबुआ मम्सेम्पा,
मिन्तो मिन्तो लामदुम्चाये,
लाइस हे, लाइस हे
गाम लिस्चाये
तोसम् तुक्चाये जिजिस,
तुक्चाये पम्, चउ,
जिजिस उइ छुपतोङ्क
हाई यो लागेइछुवो उई?
माफो माफो कोङ लेक लागेइछुवोदोन्,
आसाई हिङङस् ओ छास्,
दानाई लेत्चाये,
ओप्का १५ दोङ् चिमा ओ मामा,
ओ माइली,
मुङ्कन् मोलो ८ कक्षा पढेइ मचलोङ्,
राहिखापु काउ खोस् युवालो,
खिम् थुइबाम्पा मोलो,
‘मारे पाप पाले पुन्य पिक्तो,
पियोक उम्पाचा उम्माचा,
उउङ मिन्तो मिन्तो तुचाइलो,
छाक्का छुये,
उइसे छुवा एसे?
उइनाई ओन्तोङ्क सानीवा एसे?
ओरो मिन्चीये,
उम् भारी ओरो मिन्न,
तोङ्ने हाम्लो हाम्लोई,
भारीङ्यो मान्तु उई,
उम्चारेत्ते, पत्त उम् भारी,
भारीन् उम् उम्दोसपीङा तुये,
खोरोलोई एसे,
खुर्पदीपतोङ् लइनो एसे,
साकामा मान्तु, वाम्मा मान्तु,
सउ तुक्चाइनो, चानइचाये,
सेमो इस्चाये, मिनचायान्ची हायाम्,
आत्कावाक लिप्चाप् गाम्क हाकै?
नय उमसेप्,
नोमचीम् मिन्ना इक छिन,
होसोङ खोङ, सेमो, तय उउङ ,
होदुपाक रीङ तय सेमोपा,
खीम् तय नपछा, चेदरआ खाम्पा,
उम्छास् खात्चाये क्याम्पस,
तय, उम् बुरीम् सारी, मालो खेइमपा,
खोलोक सेमो, होदु छुचायेक,
लाइचयस देत्छा युपा,
हु ङ तुप्चाये,
मेक्सा ट्रेकिङ क्याम्पपा,
दुई घण्टा छुवा, तीन, चार...
कुइरेचीम् क्याम्पपा मान्तोस्कप्का कान्छा,
निप्पो टे«किङस्टाफ ची,
लाम्तो लाम्तो खोस् खाता,
हारै खाता खेना लोलहो,
छिप्ची कान्छा,
इम्स्चाक, नोन्चिस्को चौतारपी,
नदित्ना भारी, नदित्ना उम्सेप्,
पक्ची कान्छा, काछची, ...ए है,
माननेई कान्छा, थुत्ची एक्तो,
खोरोलोन् इम्साक रैछ कान्छान्
माम्पोम्मीना हाल्लोसो,
नोन्चीक रैछ ४ हजार मिटरतोङ,
मेरापिकमी दोरीछापुङ्,
उम्सेमो नयुक्स्ना,
उम्सेमो होक्सीना उमरापीङ्
ओरोनाङ् सियाक तुवा,
देई देई मिस्
अन्पीङ देई देई मिस
सेला थोङे हेली,
खाइय उम् मुर्दा तेल,
खुमभन्दा लाइस्पी,
बानेइमची मुचुल्का,
इल्पो असई खेना विन्निपा पुलिस युक्सस्ना,
उम्छाचा तयस् दुई लाख,
उम् ज्यानमी मूल्य,
इन्स्योरेन्सलाम्पा,
ओरोनाङ् सिजन पीच्ची,
वर्ष पीच्ची,
नयची खची सोम्
नयची खची सेमो
ओन्तोरोसर्प कान्छाचा ।
तोयोनो हन्ना कोङ खिम...
लामभरीको सेमो,
झोलाभरी पोका मुदितुना
परदेशलाम्पा खिम तोलो,
कोलाम कोम्पा नयुना,
ओ हुक्पीक घडी खोङु,
युपाक सात छुवा रैछ,
खिम तातेको साढै सात पी... मिन्तो,
सोवाइतो लोङ तोक्सु खिम्हेम्,
जिस मेक्सा लाम्दुमोलो,
ओ लाइस्पा इबुम् खिम,
खिम्पीक नाम्मे क को केछे... छेतुक,
कोङ मातोक्सो, ओ सम्तुमा मात्तुक्सु,
यो माका सदौलत यो खोङु,
ङाली यो खोङु,
सानीवामी नाक्का मान्तुप....
पीम छाम् सामेइपा का लाता,
आँ माका हो होप्तो ई लाम् लाम् तो,
खिम् ने ताम्तेम्ङा बोक्सा,
उ छुवादोसो,
चोकपा ओ नेछोस् खुर्म खेतु,
बाबा चुईगम लो सुन्तला मिठाई लो,
खेना हर्बल मिठाई सो,
बाबा चुइगम इक रुपियाम् नित्ची,
सुन्तला मिठाई इक रुपियाम् सुप्ची,
खिम तातेको ओरोनाङ,
हायम् ओजिनतो, लोङ थेन्तो,
खिम् तातेकोलोन् आय,
खिम्मी लाम्स्कोपीन् ओन्तोदेप ताल्चा,
भोटेताल्चा ये काम्दीम्पा,
खीम्बरहेम् पोतेलहेम् खोङुलोन्,
सोङ् लिमाचा गिगियो,
चारसोङ् ची तुवाचा लिमुलिमु,
गुगुरयोक सेपा, तुवा चिङ्मगो,
मिचा तुम् मात्तुस्क खिमगोपा,
सितोखोउमी बासखम् ये,
छुवाखात्क रै छ खिम्ने,
खिम्गोपा वोम्ने,
हायाम् देपङा चउ छुम्छुये,
मा..., अ चोङ्खिदो तेल्मगोपु उइ छुवा?
अखिम् म खरिम्पाचीम्ङा मायो मोलो?
नुक्का मुल्खिम्सो खेना गुगरयो,
तोक्का खिम्तोक होनित्तीस्क खेना?
खोलोङ् मान्तुक ओ?
म उम्पाङलाक औली हल्लेइमतो बुर्पचाप,
गनगने छमन कान्छान्,
हाम्येम्पा थे माका,
खेना बिन्नीपास्क?
ए, नाक्का खिम्ये से छेङ्छङ्यो,
तेल्पी विजुुली ताकप्कान् हायाम् मोज्ज रै छ,
कोङ्सो खातो नाक्का खिम्,
बोओ... ओ ओपाओमास् ओ नेछोस् क?
छाराखर तो माका,
...खेना नुक्का खिम्पुकपुक बोबो माइलास्क?
लुक्लाप्तो साहुजी साहुनी,
....फपा ममास्क?
छास् खिम्नाम लिछचीथेक.... बुम्दोपा,
....ए...
तइम्थेम्पी तइम्?
...तोक्ता लाम्दुवाप्तोक कान्छा क?
उम्मामा मान्तुकप्का साली लो उम्मालो खाइना,
इन्डीया खाताथे,
मिनु, ....केछे सिङ खेइमम्पाना,
सालो सेरलो खेइपाना ङायुखा चाम्पा,
बुम चोचीम्यान् नवीन अंकल ये छुवा हो गो,
....नाकपाक गुरे कान्छा क खिम्पा तुयेयो?
उम्मामा होक्सी हो, नौलेक एक्तो थे,
...सेमो छुवाखात्क होगो,
सामसाम सानीवापी,
पीकाक तुवा, नाम्चे खात्ची,
इकखाले ड्रेस खाप्स्चु,
इतो लाम्दुम्ची पिकादोङाक,
बुम् मीस गुगुर गुगुरक तुवा,
खन्सा उम्नीङ् गुरे,
खोरोलोइ, शाहरुख खान तोङ्क मोलो,
...आस्सोङाइ मान्तु माका केछेक ओ बुम्चीन्,
आन् ये माका परदेश पी तुवा,
...नाघी भाले... छुवा,
विन्निपास्ने खची सुर मस्हो,
छामाई गन्ची हो,
पैसा लाम्स नाम्चेहेम् खाता,
ओरो मिनु...,
सेपा पढेइमम्पालो इम् लहो,
१२ बजेसम्म पढेइमम्पा पोतेल्पा,
खोरोलो इतो पढेइ मप बुम् जित्पा,
झापा खाता हो ...क्षितिज... छुवा,
आहा... कोङ्सो ...खरि... तुवोक,
काठमाण्डुपा ...केडी... छुवो,
केछे तेल्पी, स्कुलपी,
मोजा बम्पा थाङ्नाम् फुलबर,
होम्पालो, लोङ्मी थत्ती होम्लाम्पालोक,
बुम्चीन् आस्सो मान्तु होगो तेल्पी,
चोङ्खीदो तेल्मतो वास लम्पालो,
कुना हे ङाङ खाइम्दोम्पा,
बोलुथेम्हेम् खाइम्पा दो,
पा माचा तोम्पाहो माका,
खोन्तोङ्कस्ची मोलो इनिबा हाकई,
केछे लाम्छीनी लाम्दुवा बुम्चीका,
ग्याङ्फाइटची मम्दोम्पा,
आस्सो मान्तु खुङ्कस्
उनाई खेना सुनसान?
...नोस्टाल्जिक... ङाङ छुया,
सानीवा ङाङ हासे ऊनाऊपी,
हापी तुया, हापी नेन्या, हापी गेस्या,
आई... आतोखातो,
सहर ङा,
मासोखातो,
मिस्मी हुलगोपाङ,
आत्तोनो कोङ हन्ना ओतेल,
तोयोनो अ तेल ।
No comments:
Post a Comment